Pizzumöffins

Fyrir þá sem eru hrifnir af eggjum og osti er þetta klárlega málið ef ykkur vantar tilbreytingu í þessa týpísku ommilettu. 
Ég bjó til pizzumöffins og setti í hana pepperoni, ost, egg, krydd og sósu. Þetta var rosalega gott á bragðið og mjög fljótlegt. Úr þessari uppskrift fékk ég 5 stk. af múffum.

Það sem vantar:

- 3 egg, hrærð saman með gaffli
- 3 dl rifinn ostur. Ég var bara með heimilisost með 26% fitu
- Niðurskorið pepperoni. Ég var með svona 4 stk. Þið getið sett meira eða jafnvel eitthvað annað eins og skinku, sveppi og fleira
- Sykurlaus pizzusósa
- 1 tsk Oregano
- 1 tsk hvítlaukskrydd
- Salt og pipar

Hrærið eggin með gaffli og bætið öllu nema pizzasósunni útí. Smyrjið muffins form eða setjið 1 sneið af pepperoni í botninn til að þetta festist ekki við. Hellið deiginu í hálft formið, setjið þá smá pizzasósu ofaná deigið og setjið svo deig yfir sósuna. 

Bakist við 180° í ca 15 mín eða þar til þetta er orðið fallega gyllt.

Hér er formið orðið hálft og þá fer pizzasósan yfir, síðan fer meira deig ofaná

Þær falla smá þegar þær eru teknar út

Verði ykkur að góðu! :) 

Mjög auðvelt Super nachos!

Við Svenni ákváðum að vera með burrido í matinn í kvöld og ég ætlaði upphaflega að prufa lágkolvetna tortillur fyrir mig þar sem Svenni borðar bara þessar keyptu. Síðan var ég í tímaþröng og svona frekar löt svo ég ákvað að búa mér til super nachos í staðinn. 
Ég bjó því til flögur úr osti og kryddi og setti síðan allt meðlætið ofaná.


Þetta er mjög einfalt og í rauninni engin uppskrift nema bara:

Stráður rifnum osti á ofnplötu og kryddaðu með salti, hvítlaukskryddi, cumin og chilli. (Mátt auðvitað krydda eins og þú vilt og jafnvel strá smá parmesan yfir). 
Settu þetta inn í 180° heitan ofn þar til osturinn er orðinn gylltur. Gott að stilla á grillið á ofninum ef það er í boði síðustu mínúturnar.

Taktu þetta úr úr ofninum og skerðu strax. Leyfðu þessu að kólna og verða krispí. Ef þið eruð óþolinmóð er hægt að henda þessu inn í ísskáp í nokkrar mínútur. 

Setjið síðan ykkar uppáhald ofaná flögurnar ásamt sósu og osti. Ég var með nautahakk, ost, gúrku, salsa sósu og sýrðan rjóma. Það er einnig rosalega gott að vera með ferskan kóríander og guacamole. 

Mig langar að deila með ykkur ostaskál sem ég gerði fyrir nokkrum mánuðum í leiðinni þar sem hún er búin til úr sama hráefni nema látin harða öðruvísi. 

Eini munurinn á þessari skál er sá að þegar þið stráið rifnum osti á bökunarpappírinn búið þá til hringi úr því. Þegar osturinn er orðinn ljósbrúnn er hann tekinn út, látinn standa í 5 mínútur og svo tekinn af pappírnum og settur ofaná glas og látinn harðna svoleiðis. 

Í þessari skál var ég með nautahakk sem var með chilli sósu, sýrðan rjóma, guacamole og svo ferskan kóríander. Þetta var alveg hrikalega gott! 

Ostafrækex

Ég bakaði mjög gott hrökkbrauð í dag. Borðaði það með heimagerðu túnfisksalati og þetta var æðislegt. 
Hér kemur uppskriftin:

Það sem þarf:

- 1 dl sesam fræ
- 1/2 dl graskersfræ
- 1/2 dl fræblanda sem var með sólkjarnafræjum, graskersfræjum og furuhnetum
- 1 dl rifinn ostur
- 1/2 dl rifinn mexíkó ostur
- 1 egg
- 1-2 msk kókosolía (fljótandi)
- 1 tsk salt (eða meira ef þið viljið það vel salt)
- 1/2 tsk hvítlaukskrydd

Öllu nema hvítlaukskryddinu blandað saman í skál og sett á smurðan bökunarpappír. Annar smurður pappír settur ofaná og flatt vel út með kökukefli. 
Mér finnst rosalega gott að smyrja pappírinn með kókosolíu. 
Þegar þetta er orðið útflatt er smá hvítlaukskryddi stráð yfir.
Gott er að ýta aðeins meðfram köntunum með skeið svo endarnir séu ekki of þunnir og þar af leiðandi brenni.

Hrökkbrauðið fyrir bökun

Bakað við 150° í 20 mín. Þá er þetta tekið út og skorið í hæfilega bita, snúið við á plötunni og bakað áfram við 100° í 20 mínútur í viðbót. 

Karamellu möndlur

Mig vantaði eitthvað gott snarl til að narta í svo ég ákvað að prufa að gera einhvers konar karamellaðar möndlur. Það er mjög einfalt að undirbúa þessar og tekur enga stund. Möndlurnar eru alveg ótrúlega góðar á bragðið og minna mann helst á jólin. Ilmurinn sem kemur á meðan þær grillast í ofninum er mjög góður og jólalegur :) 

Það sem þarf:

- 200 gr. af möndlum
- 1 eggjahvíta- 5 msk af sukrin gold
- 1/4 tsk salt
-1/2 tsk kanill

Þessu er öllu hrært saman í skál og sett á bökunarplötu. Ég var með álpappír undir og það er líka hægt að nota bökunarpappír. Það þarf að dreifa vel úr þessu á plötunni.

Bakað við 120° í ca klukkustund. Gott er að hræra í blöndunni á ca 15 mín. fresti svo þær brenni ekki við.

Ef þið bakið þetta á álpappír mæli ég með að taka þær strax af honum og færa yfir á disk svo þær festist ekki við, eins og gerðist næstum hjá mér ;) 

LKL Lasagne

Ég ákvað að prufa að skella í lasagne í gær. Mig hefur lengi langað að prufa uppskrift þar sem súkkíní er skipt út fyrir pasta en aldrei lagt í það. 
Ég var svo viss um að það væri mikið vesen og myndi ekki smakkast vel. 
Það kom því skemmtilega á óvart þegar ég smakkaði þennan rétt. 
Ég er ekki frá því að mér finnist það betra en þetta venjulega. Uppskriftin er svona sirka eins og ég skrifa hana en ég nota til dæmis aldrei mæliskeiðar þegar ég krydda mat heldur smakka ég hann til og spila bara eftir því. Ef þið eruð óörugg með kryddið er gott að miða við 1 tsk af hvoru til að byrja með :) 

Það sem þarf:

- 1 Súkkíní
- Nautahakk, ca 500 grömm (passið að lesa á umbúðirnar og kaupa hreint hakk)
- Hvítlaukur eða hvítlaukskrydd (ég gleymdi að kaupa hvítlauk svo ég notaði hvítlauks flögur og krydd)
- 2 msk rjómaostur
- Sykurlaus tómatsósa eða tómatar úr dós. Ég var með sósuna frá Walden Farms. Ráðið hversu mikið, prufið bara að byrja á 2-3 dl og sjá svo til
- 2-3 msk af tómat pure
- 1 dl af rjóma (sirka)
- Rifinn ostur til að setja ofaná
- 3-4 msk af Parmesan dufti eða osti (ekki nauðsynlegt en mjög gott)

Kryddið sem ég notaði var svona:

- Oregano
- Laukduft
- Hvítlauksduft
- Chilli duft (bara smá)
- Herbamare
- Salt og pipar ef þarf (geri það í lokinn þegar ég hef smakkað til)

Lasagne plöturnar:

Byrjið á því að skera súkkíní í sneiðar og leggja á pappír með slatta af salti. Leyfið þessu að standa í a.m.k. hálftíma. Þurrkið vel af þegar þetta er tilbúið. Reynið að hafa þetta ekki blautt.

Hakksósan:

Steikið hakkið með smá olíu ásamt hvítlauk og ef þið ákveðið að bæta grænmeti við setjið það með. Kryddið eins og þið viljið hafa það. Þegar hakkið er orðið steikt bætið við tómat pure, tómatsósunni og rjómaostinum. Leyfið þessu að malla og hrærið þetta vel saman í ca 5 mín á lágum hita. 

Bætið svo við rjóma og parmesan ostinum og smakkið til. Bætið við kryddi og salti og pipar ef ykkur finnst vanta meira bragð. 


Takið eldfast mót og byrjið á því að setja smá hakksósu, þar ofaná setjið þið súkkíní sneiðarnar, ofan á það fer svo hakksósan aftur og svo koll af kolli. 

Stráið rifnum osti yfir og setjið smá Oregano ofan á ostinn.

Hitið við 200° þar til osturinn er orðinn fallega gylltur.

Ég mæli með að þið berið þetta fram með fersku salati og/eða hvítlauksbrauðinu sem þið finnið hér til hliðar :) 

Dásamlegur plokkfiskur

Mig hefur lengi langað í plokkfisk en þar sem hann er stútfullur af kolvetnum hef ég ekki látið það eftir mér. Ég ákvað svo í kvöld að prufa LKL útgáfu og hann kom svo sannarlega á óvart. Mér finnst þessi mun betri heldur en þessi týpíski með kartöflum og hveiti. 
Ég mæli eindregið með að prufið þennan. 

Það sem þarf:

- 6 fiskiflök (ég var með þorsk og flökin voru ekki stór).
- 1 Laukur smátt skorinn.
- Ca 5 lúkur af blómkáli (ég var með frosið blómkál og þetta var svona 200-250 gr.).
- 2 Msk. Rjómaostur.
- 2 Msk. Smjör + 2 msk eftir að allt er komið í pottinn.
- Rjómi til að þynna
- Rifinn ostur
- 1/5-1 tsk. Karrý.
- 1/5-1 Herbamare + smá krydd yfir fiskinn þegar hann er gufusoðinn.
- 1/5-1 Hvítlaukskrydd.
- 1 tsk. Lauk krydd.
- Pipar. Ég set frekar mikið af honum en þið ráðið hversu mikið þið viljið. 
- Smá salt (valfrjálst)

Byrjum á því að strá smá Herbamare yfir fiskinn og gufusjóða hann.
Því næst er laukurinn steiktur uppúr 1 msk af smjöri.
Þegar laukurinn er orðinn mjúkur bætið þið blómkálinu við og bætið við 1 msk af smjöri.
Kryddið þetta með karrý, Herbamare, hvítlaukskryddi, lauk kryddinu og pipar. 
Þegar blómkálið er orðið mjúkt bætið þið rjómaostinum við og þarnæst gufusoðna fisknum. 
Hrærið þetta vel svo fiskurinn molni niður með lauknum og blómkálinu.
Bætið við smá rjóma til þess að þetta verði örlítið þynnra og saltið og piprið eftir smekk. 

Færið plokkfiskinn yfir í eldfast mót, stráið osti yfir og bakið inni í 180° heitum ofni þar til osturinn er bráðinn. 

Ég bætti svo smá smjöri við fiskinn þegar hann var kominn á diskinn til að gera hann meira djúsí, en ég elska smjör ;) 

Mér finnst gott að setja smá pipar áður en ég set rifna ostinn yfir

Verði ykkur að góðu! :) 

Alexander borðar ekki grænmeti en hann tók ekkert eftir blómkálinu og fannst þetta rosa gott! :) 

Grilluð samloka

Það sem ég hef stundum saknað á þessu mataræði er grilluð samloka með fullt af osti. Ég elska ost :) 

Ég ákvað að prufa að skella í einvers konar brauð þar sem ég byrjaði á að skella deiginu í samlokugrillið og svo í örbylgjuna aðeins, setti álegg og aftur á grillið. Útkoman var mjög góð. Samlokan var alveg krispí og bragðgóð. Þetta tók enga stund, en uppskriftin er kannski ekki fullkomlega nákvæm heldur verður maður aðeins að prufa sig áfram. Deigið á að vera svona svipað og þykkur hafragrautur og það þarf alveg að smyrja því á grillið til að byrja með :) 

Það sem þarf: 

- 2 Msk. Möndlumjöl.
- 1 Msk. Ground Flax (hörfræmjöl).
- 1 egg.
- Ca 1 dl. Rifinn ostur
- 2 Msk. Sesam fræ.
- 2-3 Msk. rjómi.
- 1-2 Tsk. Sukrin Gold. (Valfrjálst)
- Salt eftir smekk.
- Vatn til að þynna ef þetta er of þykkt.


Þið byrjið á því að blanda þessu öllu saman og smyrja á heitt grillið (2 sneiðar). Það gæti þurft að hafa svolítið fyrir þessu en ekkert mikið mál. 

Þegar brauðið er orðið þannig að þú getir lyft allri sneiðinni upp án þess að það detti allt í sundur tekur þú það af, setur á disk og inn í örbylgju í 2-3 mín. 
Á þessu stigi er brauðið ekkert sérstaklega girnilegt. Ég var alveg viss um að hafa klúðrað þessu þarna til dæmis! :) En þegar það er tekið úr örbylgjunni er álegg sett á. 
Ég var með fullt af osti og pepperoni frá Goða (sykurlaust). 
Samlokunni er svo lokað og skellt aftur í grillið þar til það er orðið gyllt og krispí :) 
Mjög gott að hafa einhverja sósu með til að dýfa í eða jafnvel setja pizzasósu á brauðið með álegginu. 

Verði ykkur að góðu! :) 

Mjög fljótlegur eftirréttur

Þeir sem hafa ekki mikinn tíma til að prufa sig áfram í eldhúsinu geta pottþétt reddað sér þessum. Þetta er bara þeyttur rjómi og karamellu sírópið frá Walden Farms. Þetta er svakalega gott og bragðast eins og búðingur :) 

Þetta er svakalega gott og einfalt :) 

Sítrónu og hindberja íste og pizza!

Áður en ég kem með uppskrift af pizzunni sem ég var með í kvöldmatinn langar mig að deila með ykkur hindberja og sítrónu límonaði sem ég prufaði að gera í gær.

Algjört nammi þessi! :) 

Hindberja og sítrónu íste:

Þessi drykkur er hrikalega svalandi og góður. Ef þú bætir við muldum klökum og rommi eða vodka ertu líka komin með fullkominn low carb kokteil sem þú getur drukkið án samvisku :)

Það sem þarf:

- 1 L af köldu vatni
- Sætuefni eftir smekk. Ég var með 1 msk af Sukrin Gold og 1 lítið bréf af Stevia frá Now (1 gramm)
- Hálf sítróna, bæði safinn og bátarnir
- Lúka af frosnum hindberjum (má auðvitað hafa meira eða minna)

Það eina sem þarf að gera er að setja 1 L af ísköldu vatni í könnu eða flösku, setja Stevíu og Sukrin Gold ofaní. Hér getur þú stjórnað hversu sætt/súrt þetta á að vera. Ég setti eitt lítið Stevíu bréf frá Now sem er 1g. og svo eina matskeið af Sukrin Gold. Síðan skar ég niður hálfa sítrónu og bæði kreisti ofaní og setti bátana í ásamt lúku af frosnum hindberjum. Það væri líka hægt að nota Stevíu dropa með bragði, eins og til dæmis sítrónu eða berja dropa en ég átti þá ekki til.

Gott er að blanda þetta nokkrum tímum áður en borið fram en þetta er samt sem áður mjög gott bara strax. Bragðið verður hins vegar mun meira þegar þetta hefur staðið í ísskáp í smá stund. Ég blandaði þetta til dæmis áður en ég fór að sofa og drakk svo daginn eftir. Ef þetta er blandað í flösku með loki er þetta mjög gott í alveg 2-3 daga inni í ísskáp.

Þeir sem vilja ekki fá hindberjabita uppí sig geta sigtað þetta áður en þessu er hellt í glas :)

Þetta íste er frábær sumardrykkur en þar sem sumarið er ekki enn komið og það er kominn ágúst ætla ég að njóta þess að sötra á fallegum kokteilum allt árið  ;) 

Mig langaði að hafa einhverja djúsí pizzu í kvöldmatinn svo ég ákvað að prufa mig áfram með eina uppskrift. Hún kom skemmtilega á óvart og var bara mjög góð. Pizzan var alveg mátulega ,,krönsí" og já, bara fullkomin! Ég setti pepperoni, ananas og piparost á hana. Sumir leyfa sér ekki ananas á þessu mataræði en það þarf bara að prufa sig áfram og finna það álegg sem hentar manni best. 

Lágkolvetna pizzan:

Það sem þarf:

- 3 dl. rifinn ostur. Ég var með Mozzarella.

- 3 egg.

- 1 dl. Rifinn Parmesan eða duft (má sleppa)

- 1 tsk. þurrkaðar chilli flögur eða bara chilli duft

- 1/2 Herbamare krydd

- 1 tsk. hvítlaukskrydd

- 1-2 tsk. Oregano

Ofninn hitaður í ca 180°.

Þessu öllu var hrært saman í skál 

Allt komið í skálina

Því næst var botninn smurður á bökunarpappír og passa að hafa allt frekar jafnt og endana ekki þynnri en miðjuna.

Síðan var pizzan forbökuð við ca 180°þar til hún var orðin fallega gyllt.

Hér er botninn kominn út og tilbúinn fyrir áleggið

Þegar pizzabotninn er búinn að forbakast er álegg, sósa og ostur sett á eftir smekk og aftur inní ofn þar til osturinn er bráðinn.

Pizzan tilbúin

Æðislega góð pizza

Þessi kvöldmatur var mjög fljótlegur í undirbúningi og mjög saðsamur og góður. Eftir matinn var ég svo með kirsuberja skyr/rjóma bombu með kókos, hnetum og fleira. Deili þeirri uppskrift með ykkur fljótlega en hér kemur smá sýnishorn af þessum yndislega eftirrétti (sem má nú reyndar líka borða í morgunmat, eða bara hvenær sem er)

Hrikalega gott! 

Súkkulaði og karamellunammi með Pecan hnetum

Mig langaði í eitthvað sætt í dag svo ég ákvað að prufa einhvers konar nammi með karamellu og súkkulaðibragði. Ég varð alls ekki fyrir vonbrigðum með þetta en það má ekki borða mjög mikið af þessu í einu. Bara spari! :) 

Súkkulaði og karamellu nammi með Pecan hnetum:

Súkkulaðiblanda:

50 gr. af 85% súkkulaði
1 msk vatn
1-2 msk kakó
1 msk Sukrin Gold

Karamellu og Pecan blanda:

2 msk smjör
1 msk rjómi
2 msk Sukrin Gold
50 gr. Pecan hnetur, grófmalaðar
Salt

Súkkulaði og vatn brætt saman. Þegar það er bráðið bætið við kakói og sukrin Gold og hrærið blöndunni vel saman. 

Klæðið lítið form með bökunarpappír. Gott er að smyrja pappírinn smá með kókosolíu og jafnvel strá kókosmjöli yfir olíuna ef maður er í stuði. Blöndunni er hellt ofan í formið og sett í frysti. 

Á meðan súkkulaðiblandan er að stífna er karamellan gerð.

Bræddu smjörið í potti ásamt Sukrin Gold og rjómanum og leyfðu að malla við miðlungs hita í ca 10 mín. Hrærðu af og til í en ekkert of mikið. Þegar þetta er farið að þykkna bætið pecan hnetunum saman við og hrærið. Stráið smá salti yfir. Slökkvið undir hellunni. Gott er að smakka karamelluna til og jafnvel bragðbæta með því sem vantar, Sukrin Gold eða rjóma ef ykkur finnst hún mega vera sætari.

Takið formið með súkkulaðiblöndunni út og hellið karamellublöndunni yfir. Setjið aftur í frysti í a.m.k. klukkutíma. Takið nammið af bökunarpappírnum og skerið í litla bita. Geymist í kæli eða frysti. 

Ótrúlega gott nammi! :) 

                                      Njótið vel! :)

Hvítlauksbrauðið góða

Þetta hvítlauksbrauð bjó ég til þegar mér fannst ég vanta eitthvað meðlæti þegar mig langaði ekkert sérstaklega í salat! Mér finnst þetta mjög gott og get hugsað mér að brauðið sé rosalega gott með t.d. lkl vænu lasagne eða einhverjum djúsí rétti. Það tekur örfáar mínútur að undirbúa þetta og er mjög einfalt. 

Það sem vantar:

- 200 gr. af rifnum osti. Ég var með Mozzarella sem var tilbúinn rifinn. Einn poki er akkúrat 200 grömm svo það er ansi hentugt.
- 2 egg
- Hvítlaukskrydd eftir smekk. Ég setti slatta.
- Oregano eftir smekk.
- Herbamare krydd eftir smekk.
- 1 dl af parmesan dufti (Valfrjálst. Mér finnst rosa gott að dreifa smá yfir deigið áður en það fer í ofninn).

Ofninn er hitaður í 180°. 

Öllu nema Parmesan ostinum er blandað saman í skál og hrært vel. Þessu er svo smurt á bökunarpappír. Passið að hafa ekki of þykkt og ekki of þunnt, fínt að þetta sé bara svipað og pizzadeig. Mér finnst gott að ýta svo til baka með skeið á endana svo þeir séu ekki þynnstir því þá eiga þeir til að brenna. Þetta er svo bakað þar til brauðið er orðið fallega gyllt, eða ca 15 mín. 

Mjög einfalt, fljótlegt og bragðgott! :) 

Ég hef bæði skorið hvítlauksbrauðið í strimla og svo eins og pizzasneiðar

Það er hægt að leika sér svolítið með þessa uppskrift og breyta til dæmis hvítlaukskryddinu yfir í eitthvað annað eins og chilli, rósmarín eða eitthvað girnilegt :) 

Verði ykkur að góðu! :) 

Beikonvafinn kjúklingur með hvítkáli og piparostasósu

Þessi kjúklingaréttur er einn sá besti sem ég hef smakkað. Ég var mjög fegin að eiga afgang til þess að borða í hádeginu daginn eftir. Maður verður alveg pakksaddur á þessari bombu :) 

Það sem þarf:

- Kjúklingabringur eða lundir. (Passið að hafa þær sykurlausar)
- Beikon. (Sykurlaust. Mjög algengt að það sé sykur í beikoni, ekki gleyma að lesa á pakkann)
- Piparostur.
- Rjómi, einn peli ca.
- Kjúklingakraftur, 1 stk. 
- Krydd á kjúklinginn eftir smekk. Ég notaði hvítlaukskrydd, chilli krydd og pipar.
- Parmesan duft eða rifinn ost, 1 msk sirka.
- Hvítkál. 
- Hvítlauk, 2 geira sirka.
- Smjör, 2 msk sirka.

Ég byrjaði á því að skera kjúklinginn í bita og krydda. Það er ekki nauðsynlegt að skera bringurnar en mér finnst það skemmtilegra. Þar næst setti ég beikon utanum kjúklinginn og lagði á grind og inní ofn á 180°. 
Ég var með eldfast mót undir grindinni til að taka fituna sem lekur af þessu. Þetta er bakað þar til kjúklingurinn er orðinn gegnumsteiktur og beikonið girnilegt. 

Á meðan lét ég piparost bráðna í einum pela af rjóma ásamt kjúklingakrafti. Þetta var svo smakkað til. Ef þetta er of þykkt er hægt að þynna með vatni eða mjólk. 

Hvítkálið skar ég í ræmur. Athugið að það minnkar ágætlega mikið þegar það er steikt svo það er gott að skera meira heldur en minna. 2-3 kúftar lúkur af hvítkáli á mann er fínt. 

Smjörið er brætt á pönnunni og hvítkálinu hent útá ásamt pressuðum hvítlauknum. Leyfið þessu að malla í nokkrar mínútur en hrærið í á meðan. Þegar þetta er farið að brúnast aðeins er rjóma helt úta (sirka 1 dl kannski en þið ráðið hversu blautt þið viljið hafa þetta). Því næst stráið þið 1 msk af parmesan duftinu yfir og leyfið að malla þar til hvítkálið er orðið mjúkt. 


Ótrúlega gott og enginn gengur svangur frá matarborðinu! :) 

Mér finnst best að setja hvítkálið neðst í skálina, kjúklinginn þar ofaná og svo hella vel af piparostasósunni yfir allt saman

Tilraunir

Ákvað að opna þetta blogg til þess að skrifa inn uppskriftir og það sem tengist LKL lífstílnum mínum. Þessi síða er meira fyrir mig sjálfa og til þess að geta haldið utan um þær hugmyndir sem ég fæ í eldhúsinu en það er auðvitað gaman að deila því sem vel tekst með öðrum :-) 

Hér má sjá súkkulaði nammi með karamellu og Pecan hnetum sem ég prufaði að gera í dag. Kem með uppskrift af þessu fljótlega